،،،،،،"جدول أحمال الونش-Load Charts"،،،،،،
مهم جداً في عمليات الرفع بالأوناش إني كمسئول سلامة أكون فاهم كل تفاصيل جدول أحمال الونش..
زي ما أنت شايف في الجدول اللي في الصور
هتلاقي فيه :
🔲 قائمة أفقية...
بيكون موضح فيها طول امتداد البوم. (Boom length)
🔲 قائمة رأسية...
بيكون موضح فيها طول نصف القطر (Radius)
(نصف القطر هو المسافة بين مركز دوران أو ارتكاز الونش (Axis of Rotation) (مكانه بيكون تقريباً في منتصف كابينة السواق)... وبين مركز ثقل الطرد.
🔲 هتلاقي فيه كذا رمز فوق الجدول...
أول رمز بيوضح البوم بيفرد أد ايه،
تاني رمز بيوضح امتداد الركائز،
تالت رمز بيوضح أن الونش بيلف لفه كاملة،
رابع رمز بيوضح وزن التقل،
اخر رمز دا بيوضح معامل أمان الونش اللي تم تصميم الجدول عليه....
وهو أما بيكون أمريكي (زي اللي في الجدول دا) ودا بيكون 75% من حمولة الونش.
أو بريطاني (EN) وبيكون 85%.
🔲 الوزن الأمن للونش عند تقاطع النقطتين..
هتلاقي داخل الجدول موضح لك الحمولة القصوى الآمنة للونش في الزاوية الناتجة من امتداد البوم وطول نصف القطر....
🔲 الوصلة الطائرة. (Fly Jib).
بيكون ليها جدول أحمال مخصوص بيحدد حمولتها وزاوية ميلانها... وبيكون ليها رمز بردو فوق مع الرموز اللي سبق ذكرها....
الجدول الكامل بيكون فيه تفاصيل تانية زي عدد لفات الواير علي الهوك، والمسافة المسموح بيها لفرد أو لم البوم وهو شايل الطرد دا لو تصميم الونش بيسمح بكدا.... وهكذا.
مثال علي كدا عشان توضح المعلومة (من الصور👇)
امتداد البوم = 30م
مسافة نصف القطر = 10م
الحمولة الآمنة= 26.2طن.
مع الاخذ طبعاً في الاعتبار وزن التقل وامتداد الركائز وعدد لفات الواير علي الهوك...
يبقي نفهم من كدا أن التغير في وزن التقل أو عدد لفات الواير علي بكرات الهوك أو فرد الركائز سواء كان 50% أو 100% (في اوناش تصميمها لا يسمح بالميزة دي)...... بيأثر علي الحمولة القصوي الآمنة للونش(SWL)...
يبقي قبل ما تحدد الحمل الآمن للعمل من الجدول،
لازم تراعي أن وزن التقل وعدد لفات الواير وفرد الركائز علي أرض الواقع متطابقين مع الجدول اللي في إيدك...
(طبعاً دا علاوة علي امتداد البوم وطول نصف القطر.)
لأنك هتلاقي أن علي نفس الزاوية بتختلف الحمولة القصوى الآمنة للونش طبقاً لزيادة أو نقصان ما سبق ذكره. (التقل وعدد لفات الواير وفرد الركائز)...
جدول الأحمال الكامل للونش حوالي 100 صفحة تقريباً... (علي حسب سعة الونش).
بتلاقي مثلاً كل بلوكة تقل ليها جدول مع كل لفة واير ومع امتداد الركائز سواء كان امتدادها كامل أو 50٪... وهكذا.
وعشان الونش يشيل أقصى حمل آمن ليه لازم تكون مدكك الواير علي جميع بكرات الهوك ويكون التقل كامل والركائز ممتدة امتداد كامل...
،،،،،،،كمبيوتر الونش،،،،،،،
كل التفاصيل اللي إحنا اتكلمنا عليها دي هتلاقيها علي كمبيوتر الونش....
كل اللي عليك أنك تتأكد من تطابق البيانات اللي علي أرض الواقع بجدول الاحمال وبكمبيوتر الونش....
هتلاقي موضح في الكمبيوتر طبعاً الزاوية وطول نصف القطر وامتداد البوم وعدد لفات الواير والوزن الآمن للعمل والوزن اللي الونش شايله ووزن الهوك.... وهكذا.
ليست هناك تعليقات:
إرسال تعليق